الثلاثاء، ٢٣ ديسمبر ٢٠٠٨

ضرورة اجتثاث الحزب الظالم

فجاة وبدون سابق انذار لفت دماغي وقررت اقابلها من الناحية التانية وتخيلت ان السلطه الحالية انهارت بطريقة او اخرى بس الاهم ان الشعب فاق و كان له دور في التغيير ! ازاي معرفش بس خليني اتجاوز المرحلة ده ,ولحسن او سوء حظي وجدت رؤية مستقبلية بخصوص مصير كل من ظلم الشعب المصري ظلم مادي او معنوي وكان اول قرار هو قرار اجتثات اعضاء الحزب الظالم وبالذات الكبار اوي اوي وكل على حسب موقعه في الظلم

*لكل من داسوا كرامة الشعب في المقرات الامنيه واللي كان شايفين نفسهم على خلق الله يجب ان ياتى بهم في نفس مقراتهم السابقة ويطبق عليهم حد الله سواء قتل او نكل او سجن وكل على حسب جرمه .

*لكل من سرق الشعب المطحون حله يتقطع ايديه لو هتوصل لاطرافه كلها ।

(ولكم في القصاص حياة يا اولي الألباب) اذا الباشوات ماعتبروش باللي حصل لاعضاء البعث يبقى مالهمش حل الا كده!

*لكل من ساهم في محاولة تخدير الشعب سواء كانوا (سياسيين_اعلاميين_رجال دين_فنانين الخ.....)لنبدا بالسياسيين اللي كانو بيفصلوا القرارات على مقاس امكانية تطبيق الظلم ليكون مستور ويبلعوه بأي طريقة الشعب بالذوق بالغصب المهم انه يتبلع حلهم يتعزلوا من مناصبهم وياكلو تبن مع البهايم

الإعلاميين اللي كانو بيخدرو الغلابه ان احنا في ازهى عصور الملوخية وعدالة حكومتنا الرشيده مش موجوده حتى في جواتنامو ولا الدول الاوربية جمعاء وان الاقتصاد منفتح اوي والشغل بيعيط وبيقول من اللي يشتغلني واللي شاغلين الشعب بمواضيع تافهة

حلهم حاجة واحده انهم يجيبوا اكلهم من الزباله وينقوها ويشوفوا اللي ينفع يحطوه في عربتهم الكارو

رجال الدين اصحاب الفتاوي المبررة لظلم الحكام والفتاوي البعيدة عن واقع الشعوب والفتاوي المستفزة واصحاب محاولة لي النصوص الدينية زي الاخ اللي قص الاية القرأنية وبداها ب مبارك فاتبعوه واتقوا لعلكم ترحمون والاخ التاني اللي قال ان مبارك هذا مبارك منذ ان كان في بطن امه لانه مكتوب كده في الانجيل । (ربنا يسخط عليكم انتم الاتنين في يوم واحد ) ده حلهم انهم يمسكوا مكان ماسحي الاحذية ليس تقليلا من شان ماسحي الاحذية بل ان ما يفعلونه حقا هو مسح حذاء قائدهم اما عن مسح الاحذية زعيم احدى الدول اللاتينيه افتخر في انتخاباته اللي نجح فيها انه ناضل في حياته لدرجة انه كان بيلمع !

اما الفنانين واكره ان اقول عنهم امثلة لانهم معروفين لطوب الارض المشكله ان الدنيا بلوى حواليهم ولهم نفس يعرضوا بلاويهم وافكارهم التي تخجل منها الحشرات على الاقل لو فيكم دماغ لكده اعرضوها في وقت رايق حسوا شوية دنتو بتقول الفن رسالة

حلهم انهم يتحبسوا في حديقة الحيوانات واعتقد ان الحيوانات مش هتستنضف تقعد معاهم وعليه اقترح لهم جنينة مغلقه يعملوا اللي هما عاوزينه براحتهم بس جربهم على نفسهم ميعدوش اي حد بجربهم

هؤلاء واللي زيهم هدفهم تخدير وتبنيج وتيبيس العقل العربي عن التفكير والدليل ان احنا من خمسين سنه ونحن نسير بخطى واثقة الى قاع الانهيار حيث اصبح هدف الشعوب كيف تعيش يومها اكلا وشربا و جري وراء الملذات حتى ان دولا كانت ضعيفة من سنين قلية كالهند تفوقت على العرب قاطبة و كل هؤلاء من خيبتهم يدعون انه كله تمام بس مش عارفين هما من اي باب هيدخلو المسجد الاقصى ويدعون انهم مبسوطين وسعداء هما والشعب وعليه فإن مسألة كون هؤلاء أكثر سعادة من المعارض لهم ليست أصدق من حقيقة كون السكران أكثر سعادة من الصاحي!

اخيرا في نقطه عاوز مؤسسة الحكم القادمه تاخد بالها منها اوي انهم مبيقلدوش حكومة المالكي الفاشلة مسكوا البعث كله تلطيش لا متكونوش قساه كده امسكوا كل واحد على قد جرمة واللي انضم للحزب الفاسد عشان يجوز عياله وبناته عدوها بس بحساب وهكذاالمهم في ثلاث نقط اوضحها اولا الفترات اللي فاتت كانت ظروف متتابعه فلم اتمكن من متابعه مدونتي ولا المدونات الاخرى

ثانيا المقال ده نتاج تلك الظروف وعليه فهو هرطقه فكرية عابرة لن تطول

ثاالثا وهو الاهم لو شايف تعديل اضافة حذف قول متخاف لقد بلغ المعرفش ايه الإيه

كل عام و غزة بعزة وخير ومحمد عادل وعبد العزيز مجاهد بحرية وخير وانتم بكل الخير

اخوكم ابو اعصار